„ისტორია შენი გზამკვლევია, სწავლა - წარმატების საწყისი!“

სკოლა ახორციელებს სწავლებას სამივე საფეხურზე — დაწყებით (I–VI), საბაზისო (VII–IX) და საშუალო (X–XII) კლასებში. ამჟამად სკოლაში სწავლობს დაახლოებით 450–500 მოსწავლე, მათ განათლებას უზრუნველყოფს 40-ზე მეტი კვალიფიციური პედაგოგი. სასწავლო პროცესს საფუძვლად უდევს ეროვნული სასწავლო გეგმა, თუმცა სკოლა დიდი ყურადღებით იყენებს თანამედროვე მეთოდებს, ციფრულ რესურსებს და პრაქტიკულ სწავლებას. სკოლის განსაკუთრებული საგანმანათლებლო მიმართულებაა — გაძლიერებული გერმანული ენა. სწავლისას მოსწავლეებს ეძლევათ შესაძლებლობა გაიღრმავონ გერმანული ენის ცოდნა როგორც სასაუბრო, ისე აკადემიურ დონეზე, მიიღონ მონაწილეობა სხვადასხვა საერთაშორისო სერტიფიცირებაში , დაესწრონ გერმანულენოვან კულტურულ ღონისძიებებს და ჩაერთონ საგნობრივ პროექტებში გერმანულ ენაზე.გერმანულის გაძლიერებულ სწავლებასთან ერთად, სკოლა აქტიურად ახორციელებს საერთაშორისო გაცვლით პროგრამებს გერმანიასა და პოლონეთში. ეს თანამშრომლობა ხორციელდება პარტნიორ სკოლებთან ერთად და გულისხმობს მოსწავლეების დროებით გაცვლას, ერთობლივ საგანმანათლებლო და კულტურულ ღონისძიებებს, მასპინძლობასა და ვიზიტებს. გაცვლითი პროგრამები ხელს უწყობს უცხო ენაში პროგრესს, კომუნიკაციის, ტოლერანტობისა და კულტურული გამოცდილების გამდიდრებას. მსგავსი პროექტები აძლევს მოსწავლეებს პერსპექტივას საერთაშორისო განათლებისადმი და აძლიერებს მათ დამოუკიდებლობასა და გლობალურ ხედვას.

სკოლის წარმატების ერთ-ერთი მთავარი საყრდენია პროფესიონალი და ადამიანურად ერთგული პედაგოგიური კოლექტივი — გუნდი, რომელიც მუდმივად ზრუნავს პროფესიულ ზრდაზე და ცდილობს მოსწავლეს არა მხოლოდ ცოდნა, არამედ განვითარებისთვის საჭირო უნარებიც გაუღვივოს. სკოლა თანამშრომლობს ადგილობრივ თვითმმართველობასთან, საგანმანათლებლო რესურსცენტრთან, განათლების სამინისტროსთან, საერთაშორისო სკოლებთან და არასამთავრობო ორგანიზაციებთან. პარტნიორობები უზრუნველყოფს გამოცდილების გაზიარებას, რესურსების გამოყენებას და მოსწავლეთა მრავალფეროვან ჩართულობას საგანმანათლებლო პროცესში.

ლევან გოთუას სახელობის №17 საჯარო სკოლის მისიაა — მაღალი ხარისხის, თანამედროვე და ინკლუზიური განათლების უზრუნველყოფა ყველა მოსწავლისთვის, სადაც შერწყმულია ტრადიცია და ინოვაცია, აკადემიური სტაბილურობა და ღია, მოქნილი განვითარება. სკოლა აღჭურვილია ყველაფრით, რაც აუცილებელია იმ თაობის ჩამოსაყალიბებლად, რომელიც ღირსეულად ჩაებმება საზოგადოების განვითარებაში — ცოდნით, ღირსებითა და პასუხისმგებლობით.

მისია და ხედვა:

სკოლის მისიაა, გავხდეთ ლიდერი სკოლა რეგიონის მასშტაბით გერმანული ენის გაძლიერებული სწავლებით, ვიმუშაოთ მსოფლიო დონის საგანმანათლებლო დაწესებულებებთან და მოვამზადოთ მოსწავლეები წარმატებული პროფესიული კარიერისთვის, როგორც ადგილობრივ, ისე საერთაშორისო დონეზე. აღნიშნულის რეალიზება ურუნველყოფილი იქნება უსაფრთხო, პოზიტიურ და თანამშრომლობაზე ორიენტირებულ საგანმანათლებლო გარემოში.

სკოლა 2030 წლამდე გახდება სივრცე, რომელიც ინტენსიური გერმანულენოვანი საგანმანათლებლო და სოციალური პროექტების განხორციელებით, კულტურული გაცვლებისა და თანამედროვე სწავლების მეთოდების გამოყენებით, უსაფრთხოების მაღალი სტანდარტების დამკვიდრებით, უზრუნველყოფს ევროპულ და გლობალურ სივრცეში კონკურენტუნარიანი, ლიდერი მოქალაქეების აღზრდას.

ღირებულებები:

1. ინკლუზიურობა და თანასწორობა - მრავალფეროვანი კულტურული გარემოს შექმნა, სადაც ყველა მოსწავლე იღებს თანაბარ შესაძლებლობებს.

2. ინოვაცია და კრიტიკული აზროვნება - თანამედროვე სასწავლო მეთოდების გამოყენება და დამოუკიდებელი აზროვნების განვითარება.

3. პასუხისმგებლობა და სამართლიანობა - ეთიკის, უთიერთპატივისცემის და კულტურათაშორისი გაგების ხელშეწყობა.

4. თანამშრომლობა და საზოგადოებაზე ორიენტირება - მშობლებთან, მასწავლებლებთან და ადგილობრივ თუ საერთაშორისო პარტნიორებთან მჭიდრო კავშირი.

5. პატრიოტიზმი და გლობალური მოქალაქეობა - საკუთარი კულტურის დაფასება და გერმანულენოვანი სამყაროს ღირებულებების გაგება, ევროპულ სივრცეში აქტიური ჩართვის ხელშეწყობა.

6. ინოვაციური ციფრული ტექნოლოგიების ადაპტაცია, ციფრულ სამყაროში პასუხისმგებლიანი ქცევის ხელშეწყობა.

7. მოსწავლეებისთვის ძირეული განათლების მიცემა, რომელიც ემყარება კვლევასა და სწავლის მუდმივ მოტივაციას — განათლება როგორც მთელი ცხოვრების გზა.

პროგრამები,მხარდაჭერს სერვისები

სკოლის საქმიანობა აგებულია თითოეული მოსწავლის საჭიროებასა და მოთხოვნილებაზე, რათა მოსწავლეებმა შეძლონ სკოლაში მიღებული ცოდნის პრაქტიკაში გამოყენება. სკოლას ჰყავს მაღალი აკადემიური მოსწრების მქონე მოსწავლეები და წარმატებული კურსდამთავრებულები. დიდი ყურადღება ეთმობა სკოლაში მოსწავლეთა არაფორმალურ განათლებას, მოსწავლეები აქტიურად არიან ჩართული სხვადასხვა პროექტებში, მოსწავლეთა ინტერესების გათვალისწინებით შექმნილია შემდეგი კლუბები:ქართული ენისა და ლიტერატურის კლუბი - ,,რიბირაბო",ისტორიის კლუბი: ,,მოგზაური გოთუელები",,გერმანული ენის კლუბი"